ब्रिटेनमा ब्रेक्जिटलाई लिएर राजनीतिक घम्साघम्सीः विलम्ब टार्न प्रधानमन्त्रीद्धारा विधेयक ल्याउने तयारी

३७ वर्षपछि शनिवार पनि बैठक

ब्रिटेन । ब्रिटेनका प्रधानमन्त्रीले युरोपेली सङ्घ (इयू) छाड्ने ब्रेक्जिटबारेको सहमति सम्बन्धी विधेयक आउँदो साता सांसदहरू समक्ष प्रस्तुत गर्ने घोषणा गरेका छन्।

प्रधानमन्त्री बोरिस जोनसनले ब्रिक्जिट थप विलम्ब हुन नदिन त्यसो गर्ने बताएका हुन्।

संसद्‍मा शनिवार भएको महत्त्वपूर्ण मतदानमा हार बेहोरे पनि आफू आफ्नो ब्रेक्जिट नीतिमा अविचलितु रहने दृढता व्यक्त गरे। उनले आफ्नो सहमति कार्यान्वयन गराउन आवश्यक पर्ने एउटा विधेयक संसद‍्‍मा प्रस्तुत गर्ने प्रण सुनाए।

प्रधानमन्त्री जोनसन सहमति विनाको अर्थात् नो डिल ब्रेक्जिटको सम्भावनालाई अघि बढाउन चाहन्छन्। तर त्यो सम्भावना टार्ने प्रस्तावको पक्षमा बहुमत सांसदहरूले मतदान गरे।

सभामुखले मतदानमा लगेको स्वतन्त्र सांसद सर ओलीभर लेटविनको त्यससम्बन्धी प्रस्तावको पक्षमा ३२२ मत पर्यो।मतदानमा ३०६ जना सांसदको साथ पाएको सरकार १६ भोटले पछि परेको हो।

मतदानपछि प्रधानमन्त्री ब्रेक्जिटको निम्ति तोकिएको ३१ अक्टोबरको अन्तिम समयसीमा थप बढाउन इयूलाई आग्रह गर्न बाध्य हुनेछन्। कानुन अनुसार उनले जनवरी महिनाको अन्त्यसम्म सदस्यता कायम राख्ने उद्देश्यले इयूलाई पत्राचार गर्नुपर्ने छ।

यो हार प्रधानमन्त्रीको निम्ति ठूलो धक्का ठानिएको छ। जसले ब्रिटेनले यो महिनाको अन्त्यमा जे सुकै भए पनि इयू छाड्ने कुरा बारम्बार दोहर्याउँदै आएका थिए।

तर प्रधानमन्त्री जोनसनले भने, मैले इयूसँग थप विलम्बबारे कुनै सहमति गर्ने छैन। मलाई त्यसो गर्न कानुनले पनि बाध्य बनाउँदैन।

यसअघि प्रधानमन्त्री जोनसनले आफूले इयूसँग गरेको सहमतिमा समर्थन जनाउन सांसदहरूलाई आग्रह गरेका थिए।ब्रेक्जिटमाथि अर्को जनमत सङ्ग्रह हुनुपर्ने मान्यता राख्नेहरू लण्डनमा भेला भएका थिए । उक्त सहमतिले मुलुकको उपचार हुने प्रधानमन्त्रीको भनाइ थियो।

मतदानकै लागि ब्रिटेनमा शनिवार पनि संसद्को बैठक बसेको हो। ब्रिटेनमा शनिवारका दिन पनि संसद्‌को बैठक भएको ३७ वर्षपछि पहिलो पटक थियो। बीबीसीबाट