नेपालगञ्जमा पढाई उत्सव तथा शैक्षिक प्रदर्शनी मेलाको आयोजना

यस्ता कार्यक्रमले विद्यार्थीको पढाई फलदायी हुने दावी

बाँके । कक्षा १ देखि ५ सम्मका बालबालिकाहरुको पढाई शिप विकासका साथै उनिहरुलाई पढाईतर्फ आकर्षित गराउने उदेश्यले नेपालगञ्जमा पढाई उत्सव तथा शैक्षिक प्रदर्शनी मेलाको आयोजना गरिएको छ ।

जिल्ला शिक्षा कार्यालयको समन्वयमा मंगल प्रसाद श्रोत केन्द्रको आयोजनामा बुधवार संचालन गरिएको सो पढाई उत्सव तथा शैक्षिक प्रदर्शनी मेलाको उद्घाटन गर्दै जिल्ला शिक्षा कार्यालय बाँकेका बिद्यालय निरिक्षक उद्धव श्रेष्ठले कक्षा १ देखि ५ सम्मका बालबालिकाको पढाई शिप बढाउनका लागि यस्ता उत्सवहरु निकै फलदायी हुने बताए ।

उनले बिभिन्न बिद्यालयका बिद्यार्थीहरुले बनाएका शैक्षिक सामाग्रीको प्रदर्शनीले अन्य बिद्यालयका बिद्यार्थीहरुको पठन शिपमा टेवा पुर्याउने बताए ।

सो अवसरमा बोल्दै प्रारम्भिक कक्षा पढाई कार्यक्रमका क्षेत्रीय संयोजक बखत भण्डारीले कक्षा १ देखि ३ सम्मका बालबालिकाको पढाई शिप निकै कमजोर भएकै कारण नेपाल सरकारले प्रारम्भिक कक्षा पढाई कार्यक्रम शुरु गरेको जनाउँदै सो कार्यक्रमबाट पढाई शिपमा सुधार हुने बिश्वास ब्यक्त गरे ।

पढाईको जग बलियो बनाउन शुरु कक्षामै बढी मिहिनेत र परिश्रम गर्नु पर्नेमा समेत जोड दिंदै उनले यस्ता शैक्षिक प्रदर्शनीले बिद्यार्थि र शिक्षक दुबैमा उत्साह थप्ने बताए ।

आधारभूत बिद्यालय सल्यानी बागका बिद्यालय ब्यबस्थापन समितिका अध्यक्ष रेणु शेरचनको सभापतित्वमा भएको पढाई उत्सव तथा शैक्षिक प्रदर्शनी मेलाको उद्घाटन कार्यक्रममा नेपाल पत्रकार महासंघ बाँकेका निवर्तमान सभापति रुद्र सुवेदी, मंगल प्रसाद श्रोतकेन्द्रका श्रोत ब्यक्ति केशव पौडेल लगायतले बालबालिकाको पढाई शिप बढाउन बिशेष ध्यान दिनु पर्नेमा जोड दिए ।

सो श्रोत केन्द्र अन्तर्गतका १९ र प्रारम्भिक कक्षा पढाई कार्यक्रमका ४ गरी २३ वटा बिद्यालयले सहभागिता जनाएको सो मेलामा बालबालिकाले बनाएका बिभिन्न शैक्षिक सामाग्रीहरु राखिएका थिए ।

सो प्रदर्शनीमा तिर्खा प्रावि राधापुरले प्रथम स्थान प्राप्त गरेको थियो भने आधारभूत बिद्यालय घरबारी टोलले दोस्रो तथा आधारभूत बिद्यालय सल्यानी बागले तेस्रो स्थान प्राप्त गरेको छ । सोही अवसरमा शब्द लेखन र चित्रकला प्रतियोगिताको पनि आयोजना गरिएको थियो ।

उक्त उत्सव तथा शैक्षिक प्रदर्शनी अवलोकनबाट बिद्यार्थीहरु निकै उत्साहित भएको र उनिहरुको पढाई प्रति रुचि समेत बृद्धि भएको पाइएको बाँके युनेस्को क्लबका कार्यक्रम अधिकृत आशिष बर्माले बताए । सो उत्सव तथा शैक्षिक प्रदर्शनी मेलाको आयोजनामा सेभ द चिल्ड्रेन, बाँके युनेस्को क्बल तथा एसडीएफ बाँकेले सहयोग गरेका थिए ।