हृदयेश त्रिपाठी आगामी चुनावमा सूर्य चिन्हमा नवलपरासीबाट चुनाव लड्ने

एमाले र राजपाका नेताबीच दुई बुँदे सहमती

काठमाडौं । लामो समय तराई मधेस केन्द्रित दलमा रहेका नेता हृदयेश त्रिपाठी प्रदेशसभा तथा राष्ट्रियसभाको चुनावमा एमालेको सूर्य चिन्ह लिएर चुनाव लड्ने भएका छन् ।

राष्ट्रिय जनता पार्टीका वरिष्ठ नेतासमेत रहेका त्रिपाठीको नेतृत्वमा रहेको ‘स्वतन्त्र राजनीतिक समूह’का नेताहरु सूर्य चिन्हमा चुनाव लड्ने टुंगो भएको हो । त्रिपाठीसहित बीके गुप्ता, पशुपतिदयाल मिश्र र जगदीश शुक्ला सूर्य चिन्हमा चुनाव लड्ने भएका हुन् ।

हृदयेश नवलपरासी, बीके र ईश्वरदयाल कपिलवस्तु, पशुपतिदयाल र जगदीश बाँकेबाट चुनाव लड्ने निश्चित भएको छ ।

एमाले अध्यक्ष केपी शर्मा ओलीसमेतको उपस्थितिमा एमालेका तर्फबाट महासचिव ईश्वर पोखरेल र स्वतन्त्र राजनीतिक समूहका तर्फबाट पाँचै जना नेताले संयुक्त हस्ताक्षर गरेका छन् ।

दुवै पक्षबीच भएको दुई बुँदे सहमतिमा स्वतन्त्र राजनीतिक समूहका नेता तथा कार्यकर्ताहरु आगामी प्रतिनिधिसभा, प्रदेशसभा तथा राष्ट्रियसभाको निर्वाचनमा सूर्य चिन्हमा चुनाव लड्ने र स्वतन्त्र पहिचानसहित क्रियाशील हुने उल्लेख छ । यो समाचार आजको कान्तिपुरमा प्रकाशित छ ।